تدور الارض وتدور السوالـف والسنيـن تـدور
وانا لو أني بعرف اللي راح ماني بعرف الباقـي
يقولون القصيد شعور والشاعر بـدون شعـور
واقـول الله يعاقبنـي اذا ماهـو مـن اعماقـي
انا لو اكذب بشعري وقف نبض ويبـس حنجـور
وقادر اخسـر الدنيـا عاجـز اخسـر اخلاقـي
ولاجل عنق المها والصوت الادفى والعيون الحور
وقف عمري ولا ادري ويش انا من وقفته لاقـي
قسـم بالله ماقبلـك غيـاب ولا بعـدك حظـور
لكـن ودي بفرقـاك لـو مــاودك فـراقـي
تعاتبنا بما فيـه الكفايـه مـن ثمـان شهـور
وسالت دمعتين وطاح قلـب وماتـت اشواقـي
تعدتـك المشاريـه وجفـاك اللـوم والمستـور
اذا ما يكشفه صوتـي كشفـه الحبـر باوراقـي
تعبت اضحك على نفسي وابرر لك واعيش الدور
وتعبت اجامل ظروفك واصـدق كذبـك الراقـي
يكفيني اغيب وخافقـي ماجـاك منـه قصـور
ويكفيـك اتذكـر كـل ليلـة لهفـة اعنـاقـي
تذكر يـوم اخليـك اتباههـا كبريـاء وغـرور
يوم اني اتحـدى بـك واخيـب هقـوة الهاقـي
وتذكر يوم اعذرك وانـت لاصـادق ولا معـذور
ادور لـك عـذر واصدقـه واكـذب احـداقـي
وتذكر يوم جيت من الحزن متضايـق ومكسـور
فرشت لك الضلوع وقلت لـك ياسيـد عشاقـي
خذ ضلوعي وابن فيها يسار الصدر بيت وسـور
ترى مافيه قبلك من سكـن صـدري وخفاقـي
وبعد هذا رحلـت ولا بقـى الا بيتـك المهجـور
ولا ياكبرها اليا من رحلت ومنزلـك باقـي ..!!!
الخميس ديسمبر 16, 2010 11:45 pm
